信報2008-10-16 2006年年初已睇淡，便錯過去年大牛市帶嚟嘅風光；最叻嘅人喺去年10月先睇淡！同樣理由，太早睇好亦係死罪。我老曹曾喺1974年7月開始睇好，但恒生指數喺1974年12月先見底，太早睇好代價係冇咗當年我老曹80％本金。因此恒指見底回升由得佢，直到第二個底高出第一個底為止（所謂Bottom Up）；恒指見頂亦由得佢，直到第二個頂無法高出第一個頂為止（便叫Top Down）。唔好忘記旺市莫估頂及淡市莫估底嘅格言。 第一個底由拋空者平倉造成（例如2002年10月美股），日後唔再低過呢個底才確認牛市出現（例如2003年4月）；反之，未來日子如創新低，便代表熊市繼續，反彈只係另一隻熊腳。到底上周五係底定係熊腳？等股市自己話畀大家知。如你一味想摸底，咁又點持盈保泰？我老曹冇水晶球，所以亦唔知幾時見底；只知一浪低於一浪要出貨（Top Down），一浪高於一浪才入貨（Bottom Up）。